चक्कवरङ्कितरत्तसुपादो लक्खणमण्डितआयतपण्ही।
चामरछत्तविभूसितपादो एस हि तुय्ह पिता नरसीहो।।१.
सक्यकुमारवरो सुखुमालो लक्खणचित्तितपुण्णसरीरो।
लोकहिताय गतो नरवीरो एस हि तुय्ह पिता नरसीहो।।२.
पुण्णससङ्खनिभो मुखवण्णो देवनरान पियो नरनागो।
मत्तगजिन्दविलासितगामी एस हि तुय्ह पिता नरसीहो।।३.
खत्तियसम्भवअग्गकुलीनो देवमनुस्स नमस्सितपादो।
सीलसमाधिपतिट्ठितचित्तो एस हि तुय्ह पिता नरसीहो।।४.
आयतयुत्तसुसण्ठित नासो गोपमुखो अभिनीलसुनेत्तो।
इन्दधनु अभिनीलभमुको एस हि तुय्ह पिता नरसीहो।।५.
वट्टसुमट्टसुसण्ठितगीवो सीहहनु मिगराजसरीरो।
कञ्चनसुच्छवि उत्तमवण्णो एस हि तुय्ह पिता नरसीहो।।६.
सिनिद्ध सुगम्भीरमञ्जुसुघोसो हिङ्गुलबन्धुसुरत्तजिव्हो।
वीसति वीसति सेतसुदन्तो एस हि तुय्ह पिता नरसीहो।।७.
अञ्जनवण्णसुनीलसुकेसो कञ्चनपट्टविसुद्धललाटो।
ओसधिपण्डरसुद्धउण्णो एस हि तुय्ह पिता नरसीहो।।८.
गच्छति नीलपथे विय चन्दो तारगणा परिवेठितरूपो।
सावकमज्झगतो समणिन्दो एस हि तुय्ह पिता नरसीहो।।९.