एवं मे सुतं - एकं समयं भगवा सावत्थियं विहरति जेतवने अनाथपिण्डिकस्स आरामे। अथ खो अञ्ञतरा देवता अभिक्कन्ताय रत्तिया अभिक्कन्तवण्णा केवलकप्पं जेतवनं ओभासेत्वा येन भगवा तेनुपसङ्कमि; उपसङ्कमित्वा भगवन्तं अभिवादेत्वा एकमन्तं अट्टासि।एकमन्तं ठिता खो सा देवता भगवन्तं गाथाय अज्झाभासि
१. बहू देवा मनुस्सा च, मङ्ग्लानि अचिन्तयुं।
आकङ्खमाना सोत्थानं, ब्रूहि मङ्गलमुत्तमं।।
२. असेवना च बालानं, पण्डितानञ्च सेवना।
पूजा च पूजनीयानं, एतं मङ्गलमुत्तमं।।
३. पतिरूपदेसवासो च, पुब्बे च कतपुञ्ञता।
अत्तसम्मापणिधि च, एतं मङ्गलमुत्तमं।।।।
४. बाहुसच्चञ्च सिप्पञ्च, विनयो च सुसिक्खितो।
सुभासिता च या वाचा, एतं मङ्गलमुत्तमं।।
५. मातापितुउपट्ठानं पुत्तदारस्स सङ्गहो।
अनाकुला च कम्मान्ता, एतं मङ्गलमुत्तमं।।
६. दानञ्च धम्मचरिया च, ञातकानञ्च सङ्गहो।
अनवज्जानि कम्मानि, एतं मङ्गलमुत्तमं।।
७. आरति विरति पापा, मज्जपाना च सञ्ञमो।
अप्पमादो च धम्मेसु, एतं मङ्गलमुत्तमं।।
८. गारवो च निवातो च, सन्तुट्ठी च कतञ्ञुता।
कालेन धम्मसवणं, एतं मङ्गलमुत्तमं।।
९. खन्ती च सोवचस्सता, समणानञ्च दस्सनं।
कालेन धम्मसाकच्छा, एतं मङ्गलमुत्तमं।।
१०. तपो च ब्रह्मचरियञ्च, अरियसच्चान दस्सनं।
निब्बानसच्छिकिरिया च, एतं मङ्गलमुत्तमं।।
११. फुट्टस्स लोकधम्मेहि, चित्तं यस्स न कम्पति।
असोकं विरजं खेमं, एतं मङ्गलमुत्तमं।।
१२. एतादिसानि कत्वान, सब्बत्थमपराजिता।
सब्बत्थ सोत्थिं गच्छन्ति, तं तेसं मङ्गलमुत्तमन्ति।।
महामंगल सुत्तं निट्ठितं