दसधम्म सुत्त

एवं मे सुतं — एकं समयं भगवा सावत्तियं विहरति जेतवने अनाथपिण्डिकस्स आरामे। तत्र खो भगवा भिक्खू आमन्तेसि — “भिक्खवो”ति। “भदन्ते”ति ते भिक्खू भगवतो पच्चस्सोसुं। भगवा एतदवोच — “दस इमे भिक्खवे धम्मा, पब्बजितेन अभिण्हं पच्चवेक्खितब्बं।”

कतमे दस ?

वेवण्णियस्सि अज्झुपगतोति,, पब्बजितेन अभिण्हं पच्चवेक्खितब्बं । परपिटिबद्धा मे जीविका, पब्बजितेन अभिण्हं पच्चवेक्खितब्बं । अञ्ञो मे आक्कप्पो करणीयोति, पब्बजितेन अभिण्हं पच्चवेक्खितब्बं । कच्चि नु खो मे अत्ता सीलेन न उपवदतीति, पब्बजितेन अभिण्हं पच्चवेक्खितब्बं ।

कच्चि नु खो मे विञ्ञू सब्रह्मचारी सीलतो न उपवदन्तीति, पब्बजितेन अभिण्हं पच्चवेक्खितब्बं। सब्बेहि मे पियेहि मनापेहि नानाभावो विनाभावोति, पब्बजितेन अभिण्हं पच्चवेक्खितब्बं। कम्मस्सकोम्हि कम्मदायादो कम्मयोनि कम्मबन्धु कम्मपटिसरणो; यं कम्मं करिस्सामि कल्याणं वा पापकं वा तस्स दायादो भविस्सामीति; पब्बजितेन अभिण्हं पच्चवेक्खितब्बं। कथंभूतस्स मे रत्तिंदिवा वीतिपतंतीति; पब्बजितेन अभिण्हं पच्चवेक्खितब्बं; कच्चि नु खो हं सुञ्ञागारे अभिरमामीति; पब्बजितेन अभिण्हं पच्चवेक्खितब्बं।; अत्थि नु खो मे उत्तरिमनुस्सधम्मा अलमरियञाणदस्सना विसेसो अधिगतो, सोहं पच्छिमे काले सब्रह्मचारीहि पुट्ठो न मङ्कुभविस्सामीति पब्बजितेन अभिण्हं पच्चवेक्खितब्बं। इमे खो, भिक्खवे, दस धम्मा पब्बजितेन अभिण्हं पच्चवेक्खितब्बा"ति। इदमवोच भगवा, अत्तमना ते भिक्खु भगवतो भासितं अभिनन्दुं।

दसधम्म सुत्त निट्ठितं