रतन सुत्त

यानीध भूतानि समागतानि,

भुम्मानि वा यानिव अन्तलिक्खे।

सब्बेव भूता सुमना भवन्तु,

अथोपि सक्कच्च सुणन्तु भासितं॥१॥

तस्मा हि भूता निसामेथ सब्बे,

मेत्तं करोथ मानुसिया पजाय।

दिवा च रत्तो च हरन्ति ये बलिं,

तस्मा हि ने रक्खथ अप्पमत्ता॥२॥

यं किञ्चि वित्तं इध वा हुरं वा,

सग्गेसु वा यं रतनं पणीतं।

न नो समं अत्थि तथागतेन,

इदम्पि बुद्धे रतनं पणीतं,

एतेन सच्चेन सुवत्थि होतु॥३॥

खयं विरागं अमतं पणीतं,

यदज्झगा सक्यमुनी समाहितो।

न तेन धम्मेन समत्थि किञ्चि,

इदम्पि धम्मे रतनं पणीतं,

एतेन सच्चेन सुवत्थि होतु॥४॥

यम्बुद्धसेट्ठो परिवण्णयी सुचिं,

समाधिमानन्तरिकञ्ञमाहु।

समाधिना तेन समो न विज्जति,

इदम्पि धम्मे रतनं पणीतं,

एतेन सच्चेन सुवत्थि होतु॥5॥

ये पुग्गला अट्ठसतं पसत्था,

चत्तारि एतानि युगानि होन्ति।

ते दक्खिणेय्या सुगतस्स सावका,

एतेसु दिन्नानि महप्फलानि,

इदम्पि सङ्घे रतनं पणीतं,

एतेन सच्चेन सुवत्थि होतु ॥६॥

ये सुप्पयुत्ता मनसा दल्हेन,

निक्कामिनो गोतमसासनम्हि।

ते पत्तिपत्ता अमतं विगय्ह

लद्धा मुधा निब्बुतिं भुञ्जमाना,

इदम्पि सङ्घे रतनं पणीतं,

एतेन सच्चेन सुवत्थि होतु॥७॥

यथिन्दखीलो पठविंसितो सिया,

चतुब्भि वातेभि असम्प कम्पियो।

तथूपमं सप्पुरिसं वदामि,

यो अरियसच्चानि अवेच्च पस्सति,

इदम्पि सङ्घे रतनं पणीतं,

एतेन सच्चेन सुवत्थि होतु॥८॥

ये अरियसच्चानि विभावयन्ति,

गम्भीरपञ्ञेन सुदेसितानि।

किञ्चापि ते होन्ति भुसप्पमत्ता,

न ते भवं अट्ठमं आदियन्ति,

इदम्पि सङ्घे रतनं पणीतं,

एतेन सच्चेन सुवत्थि होतु॥९॥

सहावस्स दस्सनसम्पदाय,

तयस्सु धम्मा जहिता भवन्ति।

सक्काय दिट्ठि विचिकिच्छितञ्च,

सीलब्बतं वा पि यदत्थि किञ्चि।

चतूहापायेहि च विप्पमुत्तो,

छचाभिठानानि अभब्बो कातुं,

इदम्पि सङ्घे रतनं पणीतं,

एतेन सच्चेन सुवत्थि होतु॥१०॥

किञ्चापि सो कम्मं करोति पापकं,

कायेन वाचा उद चेतसा वा।

अभब्बो सो तस्स पटिच्छादाय,

अभब्बता दिट्ठपदस्स वुत्ता,

इदम्पि सङ्घे रतनं पणीतं,

एतेन सच्चेन सुवत्थि होतु॥११॥

वनप्पगुम्बे यथा फुस्सितग्गे,

गिम्हसानमासे पठमस्मिं गिम्हे ।

तथूपमं धम्मवरं अदेसयि,

निब्बानगामिं परमं हिताय,

इदम्पि बुद्धे रतनं पणीतं,

एतेन सच्चेन सुवत्थि होतु॥१२॥

वरो वरञ्ञू वरदो वराहरो।

अनुत्तरो धम्मवरं अदेसयि।

इदम्पि बुद्धे रतनं पणीतं,

एतेन सच्चेन सुवत्थि होतु॥१३॥

खीणं पुराणं नवं नत्थि सम्भवं,

विरत्तचित्तायततिके भवस्मिं।

ते खीणबीजा अविरूळ्हिच्छन्दा,

निब्बन्ति धीरा यथायम्पदीपो।

इदम्पि सङ्घे रतनं पणीतं,

एतेन सच्चेन सुवत्थि होतु॥१४॥

यानीध भूतानि समागतानि,

भुम्मानि वा यानीव अन्तलिक्खे।

तथागतं देवमनुस्सपूजितं,

बुद्धं नमस्साम सुवत्थि होतु॥१५॥

यानीध भूतानि समागतानि,

भुम्मानि वा यानीव अन्तलिक्खे।

तथागतं देवमनुस्सपूजितं,

धम्मं नमस्साम सुवत्थि होतु॥१५॥

यानीध भूतानि समागतानि,

भुम्मानि वा यानीव अन्तलिक्खे।

तथागतं देवमनुस्सपूजितं,

सङ्घं नमस्साम सुवत्थि होतु॥१५॥

रतन सुत्त निट्ठितं