इसिगिलिसुत्तं

एवं मे सुतं, एकं समयं भगवा, राजगहे विहरति इसिगिलिस्मिं पब्बते । तत्र खो भगवा भिक्खू आमन्तेसि भिक्खवोति । भदन्तेति ते भिक्खू भगवतो पच्चस्सोसुं भगवा एतदवोच । पस्सथ नो तुम्हे भिक्खवे, एवं वेभारं पब्बतं ? एवं भन्ते । एतस्सपि खो भिक्खवे, वेभारस्स पब्बतस्स अञ्ञाव समञ्ञा अहोसि अञ्ञापञ्ञत्ति । पस्सथ नो तुम्हे भिक्खवे,एतं पण्डवं पब्बतन्ति ? एवं भन्ते । एतस्सपि खो भिक्खवे, पण्डवस्स पब्बतस्स अञ्ञाव समञ्ञा अहोसि अञ्ञा पञ्ञत्ति । पस्सथ नो तुम्हे भिक्खवे, एवं वेपुल्लं पब्बतं ? एवं भन्ते । एतस्स पि खो भिक्खवे, वेपुल्लस्स पब्बतस्स अञ्ञाव समञ्ञा अहोसि अञ्ञाव पञ्ञत्ति । पस्सथ नो तुम्हे भिक्खवे, एवं गिज्झकूटं पब्बतं ? एवं भन्ते । एतस्सपि खो भिक्खवे, गिज्झकूटस्स पब्बतस्स अञ्ञाव समञ्ञा अहोसि अञ्ञा पञ्ञत्ति । पस्सथ नो तुम्हे भिक्खवे, इमं इसिगिलिं पब्बतं ? एवं भन्ते, इमस्स पि खो भिक्खवे, इसिगिलिस्स पब्बतस्स एसाव समञ्ञा अहोसि एसा पञ्ञत्ति।

भूतपुब्बं भिक्खवे पञ्च पच्चेकबुद्धसतानि इमस्मिं इसिगिलिस्मिं पब्बते चिरनिवासिनो अहेसुं ते इमं पब्बतं पविसन्ता दिस्सन्ति पविट्ठा न दिस्सन्ति। तमेनं मनुस्सा दिस्वा एवमाहंसु, अयं पब्बतो इमे इसिगिलतीति, इसिगिल इसिगिलीत्वेव समञ्ञा उदपादि।

आचिक्खिस्सामि भिक्खवे पच्चेकबुद्धानं नामानि, कित्तयिस्सामि भिक्खवे पच्चेकबुद्धानं नामानि। देसिस्सामि भिक्खवे पच्चेकबुद्धानं नामानि, तं सुणाथ साधुकं मनसिकरोथ भासिस्सामीति। एवं भन्तेति खो ते भिक्खू भगवतो पच्चस्सोसुं, भगवा एतदवोच अरिट्ठो नाम भिक्खवे पच्चेकसम्बुद्धो इमस्मिं इसिगिलिस्मिं पब्बते चिरनिवासी अहोसि। उपरिट्ठो नाम भिक्खवे पच्चेक सम्बुद्धो इमस्मिं इसिगिलिस्मिं पब्बते चिरनिवासी अहोसि। तगरसिखी नाम भिक्खवे पच्चेकसम्बुद्धो इमस्मिं इसिगिलिस्मिं पब्बते चिरनिवासी अहोसि। यसस्सी नाम भिक्खवे पच्चेकसम्बुद्धो इमस्मिं इसिगिलिस्मिं पब्बते चिरनिवासी अहोसि। सुदस्सनो नाम भिक्खवे पच्चेकसम्बुद्धो इमस्मिं इसिगिलिस्मिं पब्बते चिरनिवासी अहोसि। पियदस्सी नाम भिक्खवे पच्चेकसम्बुद्धो इमस्मिं इसिगिलिस्मिं पब्बते चिरनिवासी अहोसि। गन्धारो नाम भिक्खवे पच्चेकसम्बुद्धो इमस्मिं इसिगिलिस्मिं पब्बते चिरनिवासी अहोसि। पिण्डोलो नाम भिक्खवे पच्चेकसम्बुद्धो इमस्मिं इसिगिलिस्मिं पब्बते चिरनिवासी अहोसि। उपासभो नाम भिक्खवे पच्चेकसम्बुद्धो इमस्मिं इसिगिलिस्मिं पब्बते चिरनिवासी अहोसि। नीथो नाम भिक्खवे पच्चेकसम्बुद्धो इमस्मिं इसिगिलिस्मिं पब्बते चिरनिवासी अहोसि। तथो नाम भिक्खवे पच्चेकसम्बुद्धो इमस्मिं इसिगिलिस्मिं पब्बते चिरनिवासी अहोसि। सुतवा नाम भिक्खवे पच्चेकसम्बुद्धो इमस्मिं इसिगिलिस्मिं पब्बते चिरनिवासी अहोसि। भावितत्तो नाम भिक्खवे पच्चेकसम्बुद्धो इमस्मिं इसिगिलिस्मिं पब्बते चिरनिवासी अहोसीति।

ये सत्तसारा अनीघा निरासा, पच्चेकमेवज्झगमुं सुबोधि ।

तेसं विसल्लानं नरुत्तमानं, नामानि मे कित्तयतो सुणाथ ॥१॥

अरिट्ठो उपरिट्ठो तगरसिखी यसस्सी, सुदस्सनो पियदस्सी च बुद्धो ।

गन्धारो पिण्डोलो उपासभो च, नीथो तथो सुतवा भावितत्तो ॥२॥

सुम्भो सुभो मेथुलो अट्ठमो च, अथस्सुमेघो अनीघो सुदाठो ।

पच्चेकबुद्धा भवनेत्तिखीणा, हिङ्गू च हिङ्गो च महानुभावा ॥३॥

द्वेजालिनो मुनिनो अट्ठको च, अथ कोसलो बुद्धो अथो सुबाहु।

उपनेमिसो नेमिसो सन्तचित्तो, सच्चो तथो विरजो पण्डितो च ॥४॥

कालूपकाला विजितो जितो च, अङ्गो च पङ्गो च गुतिज्जितो च ।

पस्सी जही उपधि दुक्खमूलं अपराजितो मारबलं अजेसि ॥५॥

सत्था पवत्ता सरभङ्गो लोमहंसो, उच्चङ्गमायो असितो अनासवो।

मनोमयो मानिच्छद्दो च बन्धुमा, तदाधिमुत्तो विमलो च केतुमा ॥६॥

केतुम्बरागो च मातङ्गो अरियो, अथच्चुतो अच्चुतगामब्यमको ।

सुमङ्गलो दब्बिलो सुप्पतिट्ठितो, असय्हो खेमाभिरतो च सोरतो ॥७॥

दुरन्नयो सङ्घो अथोपि उच्चयो, अपरो मुनी सङ्घो अनोमनिक्कमो।

आनन्द नन्दो उपनन्दो भारद्वाजो अन्तिमदेहधारी

बोधी महानामो अथोपि उतरो, केसी सिखी सुन्दरो भारद्वाजो ।

तिस्सूपतिस्सा भवबन्धनच्छिदा, उपसीदरी तण्हच्छिदो च सीदरी ॥९॥

बुद्धो अहु मण्डलो वीतरागो, उसभच्छिदा जालिनि दुक्खमूलं।

सन्तं पदं अज्झगमूपनीतो, उपसथो सुन्दरो सच्चनामो ॥१०॥

जेतो जयन्तो पदुमो उप्पलो च, पदुमुत्तरो रक्खितो पब्बतो च ।

मानत्थद्धो सोभितो वीतरागो कण्हो च बुद्धो सुविमुत्तचित्तो ॥११॥

एते च अञ्ञे च महानुभावा पच्चेकबुद्धा भवनेत्तिखीणा ।

ते सब्बसञ्ञातिगते महेसी परिनिब्बुते वन्दथ अप्पमेय्येति ॥१२॥

इसिगिलिसुत्तं निट्ठितं

दुतियकभाणवार निट्ठितं