एवं मे सुतं, एकं समयं भगवा सावत्थियं विहरति जेतवने अनाथपिण्डिकस्स आरामे। तेन खो पन समयेन, आयस्मा गिरिमानन्दो आबाधिको होति दुक्खितो बाळ्हगिलानो। अथ खो आयस्मा आनन्दो येन भगवा तेनुपसङ्कमि। उपसङ्कमित्वा भगवन्तं अभिवादेत्वा एकमन्तं निसीदि।
एकमन्तं निसिन्नो खो आयस्मा आनन्दो भगवन्तं एतदवोच। आयस्मा भन्ते गिरिमानन्दो, आबाधिको होति दुक्खितो बाळ्हगिलानो। साधु भन्ते भगवा येनायस्मा गिरिमानन्दो तेनुपसङ्कमतु अनुकम्पं उपादायाति।
सचे खो त्वं आनन्द ! गिरिमानन्दस्स भिक्खुनो, उपसङ्कमित्वा दस सञ्ञा भासेय्यासि, ठानं खो पनेतं विज्जति यं गिरिमानन्दस्स भिक्खुनो, दस सञ्ञा सुत्वा सो आबाधो ठानसो पटिप्पस्सम्भेय्य।
कतमे दस ? अनिच्चसञ्ञा, अनत्तसञ्ञा, असुभसञ्ञा, आदीनवसञ्ञा, पहानसञ्ञा, विरागसञ्ञा, निरोधसञ्ञा, सब्बलोके अनभिरतसञ्ञा, सब्ब सङ्खारेसु अनिच्चसञ्ञा, आनापानसति।
कतमाचानन्द अनिच्चसञ्ञा ? इधानन्द भिक्खु अरञ्ञगतो वा रुक्खमूलगतो वा सुञ्ञागारगतो वा इति पटिसञ्चिक्खति। रूपं अनिच्चं वेदना अनिच्चा, सञ्ञा अनिच्चा, सङ्खारा अनिच्चा, विञ्ञाणं अनिच्चन्ति । इति इमेसु पञ्चसूपादानक्खन्धेसु अनिच्चानुपस्सी विहरति। अयं वुच्चतानन्द अनिच्चसञ्ञा।
कतमा चानन्द अनत्तसञ्ञा ? इधानन्द भिक्खु अरञ्ञगतो वा रुक्खमूलगतो वा सुञ्ञागारगतो वा इति पटिसञ्चिक्खति । चक्खुं अनत्ता, रूपं अनत्ता, सोतं अनत्ता, सद्धा अनत्ता,घाणं अनत्ता, गन्धा अनत्ता, जिव्हा अनत्ता, रसा अनत्ता, कायो अनत्ता, फोट्ठब्बा अनत्ता, मनो अनत्ता, धम्मा अनत्ताति । इति इमेसु छसु अज्झत्तिक बाहिरेसु आयतनेसु अनत्तानुपस्सी विहरति। अयं वुच्चतानन्द अनत्तसञ्ञा।
कतमा चानन्द असुभसञ्ञा ? इधानन्द भिक्खु इममेव कायं उद्दं पादतला अधो केसमत्थका तचपरियन्तं पूरं नानप्पकारस्स असुचिनो पच्चवेक्खति ।
अत्थि इमस्मिं काये केसा लोमा नखा दन्ता तचो मंसं नहारु अट्ठी अट्ठिमिञ्जं वक्कं हदयं यकनं किलोमकं पिहकं पप्पासं अन्तं अन्तगुणं उदरियं करीसं पित्तं सेम्हं पुब्बो लोहितं सेदो मेदो अस्सु वसा खेळो सिघाणिका लसिका मुत्तन्ति । इति इमस्मिं काये असुभानुपस्सी विहरति। अयं वुच्चतानन्द असुभसञ्ञा।
कतमा चानन्द आदीनवसञ्ञा? इधानन्द भिक्खु अरञ्ञगतो वा रुक्खमूलगतो वा सुञ्ञागारगतो वा इति पटिसञ्चिक्खति । बहु दुक्खो खो अयं कायो, बहु आदीनवो। इति इमस्मिं काये विविधा आबाधा उप्पज्जन्ति। सेय्यथीदं-चक्खुरोगो, सोतरोगो, घाणरोगो, जिव्हारोगो, कायरोगो, सीसरोगो, कण्णरोगो, मुखरोगो, दन्तरोगो, कासो, सासो, पिनासो, डहो, जरो, कुच्छिरोगो, मुच्छा, पक्कन्दिका, सूला, विसूचिका, कुठ्ठं, गण्डो, किलासो, सोसो, अपमारो, दद्दु, कण्डु, कच्छु, रखसा, वितच्छिका, लोहितपित्तं, मधुमेहो, अंसा पिळका, भगन्दला, पित्तसमुट्ठाना आबाधा, सेम्हसमुट्ठाना आबाधा, वातसमुट्ठाना आबाधा, सन्निपातिका आबाधा, उतुपरिणामजा आबाधा, विसमपरिहारजा आबाधा, ओपक्कमिका आबाधा, कम्मविपाकजा आबाधा, सीतं उण्हं जिघच्छा, पिपासा, उच्चारो, पस्सावोति । इति इमस्मिं काये आदीनवानुपस्सी विहरति । अयं वुच्चतानन्द आदीनवसञ्ञा।
कतमा चानन्द पहानसञ्ञा ? इधानन्द भिक्खु उप्पन्नं कामवितक्कं नाधिवासेति पजहति विनोदेति ब्यन्तीकरोति अनभावं गमेति। उप्पन्नं ब्यापादवितक्कं नाधिवासेति पजहति विनोदेति ब्यन्तीकरोति अनभावं गमेति। उप्पन्नं विहिंसावितक्कं नाधिवासेति पजहति विनोदेति ब्यन्तीकरोति अनभावं गमेति। उप्पन्नुप्पन्ने पापके अकुसले धम्मे नाधिवासेति पजहति विनोदति ब्यन्तीकरोति अनभावं गमेति । अयं वुच्चतानन्द पहानसञ्ञा।
कतमा चानन्द विरागसञ्ञा ? इधानन्द भिक्खु अरञ्ञगतो वा रुक्खमूलगतो वा सुञ्ञागारगतो वा इति पटिसञ्चिक्खति- एतं सन्तं एतं पणीतं यदिदं सब्बसङ्खारसमथो सब्बूपधिपटिनिस्सग्गो तण्हक्खयो विरागो निरोधो निब्बानन्ति। अयं वुच्चतानन्द विरागसञ्ञा।
कतमा चानन्द निरोधसञ्ञा ? इधानन्द भिक्खु अरञ्ञगतो वा रुक्खमूलगतो वा सुञ्ञागारगतो वा इति पटिसञ्चिक्खति । एतं सन्तं एतं पणीतं यदिदं सब्बसङ्खारसमथो सब्बूपधिपटिनिस्सग्गो तण्हक्खयो विरागो निरोधो निब्बानन्ति । अयं वुच्चतानन्द निरोधसञ्ञा।
कतमा चानन्द सब्बलोके अनभिरतसञ्ञा ? इधानन्द भिक्खु ये लोके उपायुपादाना चेतसो अधिट्ठानाभिनिवेसानुसया ते पजहन्तो विरमति न उपादियन्तो। अयं वुच्चतानन्द सब्बलोके अनभिरतसञ्ञा।
कतमा चानन्द सब्बसङ्खारेसु अनिच्चसञ्ञा? इधानन्द भिक्खु सब्बसङ्खारेहि अट्टीयति हरायति जिगुच्छति। अयं वुच्चतानन्द सब्बसङ्खारेसु अनिच्चसञ्ञा।
कतमा चानन्द आनापानसति ? इधानन्द भिक्खु अरञ्ञगतो वा रुक्खमूलगतो वा सुञ्ञागारगतो वा निसीदति पल्लङ्कं आभुजित्वा उजुं कायं पणिधाय परिमुखं सतिं उपठपेत्वा।
सो सतोव अस्ससति, सतो पस्ससति। दीघं वा अस्ससन्तो दीघं अस्ससामीति पजानाति, दीघं वा पस्ससन्तो दीघं पस्ससामीति पजानाति । रस्सं वा अस्ससन्तो रस्सं अस्ससामीति पजानाति। रस्सं वा पस्ससन्तो रस्सं पस्ससामीति पजानाति। सब्बकायपटिसंवेदी अस्ससिस्सामीति सिक्खति । सब्बकायपटिसंवेदी पस्ससिस्सामीति सिक्खति । पस्सम्भयं कायसङ्खारं अस्ससिस्सामीति सिक्खति। पस्सम्भयं काय सङ्खारं पस्ससिस्सामीति सिक्खति। पीतिपटिसंवेदी अस्ससिस्सामीति सिक्खति। पीतिपटिसंवेदी पस्ससिस्सामीति सिक्खति। सुखपटिसंवेदी अस्ससिस्सामीति सिक्खति। सुखपटिसंवेदी पस्ससिस्सामीति सिक्खति। चित्तसङ्खारपटिसंवेदी अस्ससिस्सामीति सिक्खति। चित्तसङ्खारपटिसंवेदी पस्ससिस्सामीति सिक्खति। पस्सम्भयं चित्तसङ्खारं अस्ससिस्सामीति सिक्खति। पस्सम्भयं चित्तसङ्खारं पस्ससिस्सामीति सिक्खति। चित्तपटिसंवेदी अस्ससिस्सामीति सिक्खति। चित्तपटिसंवेदी पस्ससिस्सामीति सिक्खति, अभिप्पमोदयं चित्तं अस्ससिस्सामीति सिक्खति, अभिप्पमोदयं चित्तं पस्ससिस्सामीति सिक्खति। समादहं चित्तं अस्ससिस्सामीति सिक्खति। समादहं चित्तं पस्ससिस्सामीति सिक्खति। विमोचयं चित्तं अस्ससिस्सामीति सिक्खति, विमोचयं चित्तं पस्ससिस्सामीति सिक्खति। अनिच्चानुपस्सी अस्ससिस्सामीति सिक्खति, अनिच्चानुपस्सी पस्ससिस्सामीति सिक्खति। विरागानुपस्सी अस्ससिस्सामीति सिक्खति, विरागानुपस्सी पस्ससिस्सामीति सिक्खति। निरोधानुपस्सी अस्ससिस्सामीति सिक्खति, निरोधानुपस्सी पस्ससिस्सामीति सिक्खति। पटिनिस्सग्गानुपस्सी अस्ससिस्सामीति सिक्खति, पटिनिस्सग्गानुपस्सी पस्ससिस्सामीति सिक्खति। अयं वुच्चतानन्द आनापानस्सति।
सचे खो त्वं आनन्द गिरिमानन्दस्स भिक्खुनो उपसङ्कमित्वा इमा दस सञ्ञा भासेय्यासि, ठानं खो पनेतं विज्जति, यं गिरिमानन्दस्स भिक्खुनो इमा दस सञ्ञा सुत्वा सो आबाधो ठानसो पटिप्पस्सम्भेय्यति।
अथ खो आयस्मा आनन्दो भगवतो सन्तिके इमा दस सञ्ञा उग्गहेत्वा येनायस्मा गिरिमानन्दो तेनुपसङ्कमि, उपसङ्कमित्वा आयस्मतो गिरिमानन्दस्स इमा दस सञ्ञा अभासि। अथ खो आयस्मतो गिरिमानन्दस्स इमा दस सञ्ञा सुत्वा सो आबाधो ठानसो पटिप्पस्सम्भि । वुड्ढि चायस्मा गिरिमानन्दो तम्हा आबाधा तथा पहीनो च पनायस्मतो गिरिमानन्दस्स सो आबाधो अहोसीति।
गिरिमानन्दसुत्तं निट्ठितं