एवं मे सुतं, एकं समयं भगवा राजगहे विहरति वेळुवने कलन्दकनिवापे। तेन खो पन समयेन, भगवा आबाधिको होति दुक्खितो बाळ्हगिलानो। अथ खो आयस्मा महाचुन्दो सायण्हसमयं पटिसल्लाना वुट्ठितो येन भगवा तेनुपसङ्कमि। उपसङ्कमित्वा भगवन्तं अभिवादेत्वा एकमन्तं निसीदि। एकमन्तं निसिन्नं खो आयस्मन्तं महाचुन्दं भगवा एतदवोच:-
पटिभन्तु तं चुन्द बोज्झङ्गति। सत्ति मे भन्ते ! बोज्झङ्गा, भगवता सम्मदक्खाता भाविता बहुलीकता, अभिञ्ञाय सम्बोधाय निब्बानाय संवत्तति । कतमे सत्त ? सतिसम्बोज्झङ्गो खो भन्ते ! भगवता सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति। धम्मविचय सम्बोज्झङ्गो खो भन्ते ! भगवता सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति । विरियसम्बोज्झङ्गो खो भन्ते ! भगवता सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति। पीतिसम्बोज्झङ्गो खो भन्ते ! भगवता सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति। पस्सद्धिसम्बोज्झङ्गो खो भन्ते ! भगवता सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति। समाधिसम्बोज्झङ्गो खो भन्ते ! भगवता सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति। उपेक्खासम्बोज्झङ्गो खो भन्ते ! भगवता सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति ।
इमे खो भन्ते ! सत्तसम्बोज्झङ्गा भगवता सम्मदक्खाता भाविता बहुलीकता, अभिञ्ञाय सम्बोधाय निब्बानाय संवत्तन्तीति ।
तग्घ चुन्द बोज्झङ्गा, तग्घ चुन्द बोज्झङ्गाति । इदमवोचायस्मा महाचुन्दो, समनुञ्ञो सत्था अहोसि। उट्ठाहि च भगवा तम्हा आबाधा, तथा पहीनो च भगवतो सो आबाधो अहोसीति।
महाचुन्दथेर बोज्झङ्गं निट्ठितं