एवं मे सुतं, एकं समयं भगवा, राजगहे विहरति वेळुवने कलन्दकनिवापे । तेन खो पन समयेन आयस्मा महामोग्गल्लानो गिज्झकूटे पब्बते विहरति आबाधिको दुक्खितो बाळ्हगिलानो ।
अथ खो भगवा सयन्हसमयं पटिसल्लाना वुट्ठितो येनायस्मा महामोग्गल्लानो तेनुपसङ्कमि । उपसङ्कमित्वा पञ्ञत्ते आसने निसीदि । निसज्ज खो भगवा आयस्मन्तं महामोग्गल्लानं एतदवोच ।
कच्चि ? ते मोग्गल्लान खमनीय कच्चि ? यापनीय कच्चि ? दुक्खा वेदना, पटिक्कमन्ति नो अभिक्कमन्ति, पटिक्कमोसानं पञ्ञायति नो अभिक्कमोति ? न मे भन्ते, खमनीय न यापनीय बाळ्हा मे दुक्खा वेदना, अभिक्कमन्ति नो पटिक्कमन्ति, अभिक्कमोसानं पञ्ञायति, नो पटिक्कमोति ।
सत्ति मे मोग्गल्लान बोज्झङ्गा मया सम्मदक्खाता भाविता बहुलीकता, अभिञ्ञाय सम्बोधाय निब्बानाय संवत्तन्ति । कतमे सत्त ? सतिसम्बोज्झङ्गो खो मोग्गल्लान मया सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति । धम्मविचयसम्बोज्झङ्गो खो मोग्गल्लान मया सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति । विरियसम्बोज्झङ्गो खो मोग्गल्लान मया सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति । पीतिसम्बोज्झङ्गो खो मोग्गल्लान मया सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति । पस्सद्धिसम्बोज्झङ्गो खो मोग्गल्लान मया सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति । समाधिसम्बोज्झङ्गो खो मोग्गल्लान मया सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति । उपेक्खासम्बोज्झङ्गो खो मोग्गल्लान मया सम्मदक्खातो भावितो बहुलीकतो, अभिञ्ञाय सम्बोधाय निब्बानाय संवत्तति । इमे खो मोग्गल्लान सत्तसम्बोज्झङ्गा मया सम्मदक्खाता भाविता बहुलीकता अभिञ्ञाय सम्बोधाय निब्बानाय संवत्तन्ति ।।
तग्घ भगवं बोज्झङ्गा तग्घ सुगत बोज्झङ्गाति । इदमवोच च भगवा अत्तमनो आयस्मा महामोग्गल्लानो, भगवतो भासितं अभिनन्दि । वुट्ठाहिचायस्मा महामोग्गल्लानो तम्हा आबाधा, तथा पहीनो चायस्मतो महामोग्गल्लानस्स सो आबाधो अहोसीति ।
महामोग्गल्लानथेर बोज्झङ्ग परित्तं निट्ठितं