पटिच्चसमुप्पाद (परित्तारम्भ)

नमो तस्स भगवतो अरहतो सम्मासम्बुद्धस्स-3 ।

अविज्जापच्चया सङ्खारा । सङ्खारपच्चया विञ्ञाणं । विञ्ञाणपच्चया नामरूपं । नामरूपपच्चया सलायतनं । सलायतनपच्चया फस्सो । फस्सपच्चया वेदना । वेदनापच्चया तण्हा । तण्हापच्चया उपादानं । उपादानपच्चया भवो । भवपच्चया जाति । जातिपच्चया जरामरणं सोकपरिदेवदुक्खदोमनस्सुपायासा सम्भवन्ति । एवमेतस्स केवलस्स दुक्खक्कन्धस्स समुदयो होति ॥

अविज्जायत्वेव असेसविरागनिरोधा सङ्खारनिरोधो । सङ्खारनिरोधा विञ्ञाणनिरोधो । विञ्ञाणनिरोधा नामरूपनिरोधो । नामरूपनिरोधा सलायतननिरोधो । सलायतननिरोधा फस्सनिरोधो । फस्सनिरोधा वेदनानिरोधो । वेदनानिरोधा तण्हानिरोधो । तण्हानिरोधा उपादाननिरोधो । उपादाननिरोधा भवनिरोधो । भवनिरोधा जातिनिरोधो । जातिनिरोधा जरामरणं सोकपरिदेवदुक्खदोमनस्सुपायासा निरुज्झन्ति । एवमेतस्स केवलस्स दुक्खक्कन्धस्स निरोधो होति ॥

अनेकजातिसंसारं सन्धाविस्सं अनिब्बिसं । गहकारकं गवेसन्तो दुक्खा जाति पुनप्पुनं ॥ गहकारक दिट्ठोसि पुन गेहं न काहसि । सब्बा ते फासुका भग्गा गहकूटं विसङ्खतं । विसङ्खारगतं चित्तं तण्हानं खयमज्झगा ॥

पटिच्चसमुप्पाद निट्ठितं