एवं मे सुतं एकं समयं भगवा, सक्केसु विहरति कपिलवत्थुस्मिं महावने महता भिक्खुसंघेन सद्धिं पञ्चमत्तेहि भिक्खुसतेहि सब्बेहेव अरहन्तेहि । दसहि च लोकधातुहि देवता येभुय्येन सन्निपतिता होन्ति भगवन्तं दस्सनाय भिक्खुसंघञ्च । अथ खो चत्तारो सुद्धावासकायिका देवता एतदहोसुं । अयं खो भगवा सक्केसु विहरति कपिलवत्थुस्मिं महावने महता भिक्खुसंघेन सद्धिं पञ्चमत्तेहि भिक्खुसतेहि सब्बेहेव अरहन्तेहि । दसहि च लोकधातुहि देवता येभुय्येन सन्निपतिता होन्ति भगवन्तं दस्सनाय भिक्खुसंघञ्च । यन्नून मयम्पि । येन भगवन्तं तेनुपसङ्कमेय्याम उपसङ्कमित्वा भगवतो सन्तिके पच्चेकगाथं भासेय्यामाति ।
अथ खो ता देवता सेय्यथापि नाम बलवा पुरिसो सम्मिज्जितं वा बाहं पसारेय्य पसारितं वा बाहं सम्मिञ्जेय्य, एवमेवं सुद्धावासेसु देवेसु अन्तरहिता भगवतो पुरतो पातुरहंसुं । अथ खो ता देवता भगवन्तं अभिवादेत्वा एकमन्तं अट्ठंसु । एकमन्तं ठिता खो ता एका देवता भगवतो सन्तिके इमं गाथं अभासि ।
महासमयो पवनस्मिं, देवकाया समागता ।
आगताम्ह इमं धम्मसमयं, दक्खिताये अपराजितसङ्घन्ति ॥१॥
अथ खो अपरा देवता भगवतो सन्तिके इमं गाथं अभासि ।
तत्र भिक्खवो समादहंसु, चित्तं अत्तनो उजुकमकंसु ।
सारथीव नेत्तानि गहेत्वा इन्द्रियानि रक्खन्ति पण्डिताति ॥२॥
अथ खो अपरा देवता भगवतो सन्तिके इमं गाथं अभासि ।
छेत्वा खीलं छेत्वा पलिघं, इन्द्रखीलं ऊहच्चमनेजा ।
ते चरन्ति सुद्धा विमला, चक्खुमता सुदन्ता सुसुनागाति ॥३॥
अथ खो अपरा देवता भगवतो सन्तिके इमं गाथं अभासि ।
ये केचि बुद्धं सरणं गतासे, न ते गमिस्सन्ति अपायं ।
पहाय मानुसं देहं देवकायं अपराजितसङ्घन्तीति ॥४॥
अथ खो भगवा भिक्खू आमन्तेसि । येभुय्येन भिक्खवे दससु लोकधातुसु देवता सन्निपतिता तथागतं दस्सनाय भिक्खुसंघञ्च; येपि ते भिक्खवे अहेसुं अतीतमद्धानं अरहन्तो सम्मासम्बुद्धा तेसम्पि भगवन्तानं एतपरमायेव देवता सन्निपतिता अहेसुं सेय्यथापि मय्हं एतरहि । येपि ते भिक्खवे भविस्सन्ति अनागतमद्धानं अरहन्तो सम्मासम्बुद्धा तेसम्पि भगवन्तानं एतपरमायेव देवता सन्निपतिता भविस्सन्ति सेय्यथापि मय्हं एतरहि ।
आचिक्खिस्सामि भिक्खवे देवकायानं नामानि, कित्तयिस्सामि भिक्खवे देवकायानं नामानि, देसिस्सामि भिक्खवे देवकायानं नामानि, तं सुणाथ साधुकं मनसिकरोथ भासिस्सामीति ।
एवं भन्तेति खो ते भिक्खू भगवतो पच्चस्सोसुं, भगवा एतदवोच ।
सिलोकमनुकस्सामि, यत्थ भुम्मा तदस्सिता ।
ये सिता गिरिगब्भारं पहितत्ता समाहिता ॥1॥
पुथुसीहाव सल्लीना, लोमहंसाभिसम्भुनो ।
ओदातमनसा सुद्धा, विप्पसन्नमनाविला ॥2॥
भिय्यो पञ्चसते ञत्वा, वने कापिलवत्थवे ।
ततो आमन्तयी सत्था, सावके सासने रते ॥3॥
देवकाया अभिक्कन्ता, ते विजानाथ भिक्खवो ।
ते च आतप्पमकरुं सुत्वा बुद्धस्स सासनं ॥4॥
तेसं पातुरहु ञाणं अमनुस्सानदस्सनं ।
अप्पेके सतमद्दक्खुं, सहस्सं अथ सत्ततिं ॥5॥
सतं एके सहस्सानं, अमनुस्सानमद्दसुं।
अप्पकेनन्तमद्दक्खुं दिसा सब्बा फुटा अहु ॥6॥
तञ्च सब्बं अभिञ्ञाय, ववक्खित्त्वान चक्खुमा ।
ततो आमन्तयी सत्था, सावके सासने रते ॥7॥
देवकाया अभिक्कन्ता ते विजानाथ भिक्खवो ।
ये वोहं कित्तयिस्सामि गिराहि अनुपुब्बसो ॥8॥
सत्त सहस्सा यक्खा, भुम्मा कापिलवत्थवा ।
इद्धिमन्तो जुतीमन्तो, वण्णवन्तो यसस्सिनो ।
मोदमाना अभिक्कामुं, भिक्खूनं समितिं वनं ॥9॥
छ सहस्सा हेमवता, यक्खा नानत्तवण्णिनो ।
इद्धिमन्तो जुतीमन्तो, वण्णवन्तो यसस्सिनो ।
मोदमाना अभिक्कामुं, भिक्खूनं समितिं वनं ॥10॥
सातागिरा तिसहस्सा, यक्खा नानत्तवण्णिनो ।
इद्धिमन्तो जुतीमन्तो, वण्णवन्तो यसस्सिनो ।
मोदमाना अभिक्कामुं, भिक्खूनं समितिं वनं ॥11॥
इच्चेते सोलससहस्सा, यक्खा नानत्तवण्णिनो ।
इद्धिमन्तो जुतीमन्तो वण्णवन्तो यसस्सिनो ।
मोदमाना अभिक्कामुं भिक्खूनं समितिं वनं ॥12॥
वेस्सामित्ता पञ्चसता, यक्क्खा नानत्तवण्णिनो ।
इद्धिमन्तो जुतीमन्तो, वण्णवन्तो यसस्सिनो ।
मोदमाना अभिक्कामुं, भिक्खूनं समितिं वनं ॥13॥
कुम्भीरो राजगहिको, वेपुल्लस्स निवेसनं ।
भिय्यो नं सतसहस्सं, यक्खानं पयिरुपासति ।
कुम्भीरो राजगहिको, सोपाग समितिं वनं ॥14॥
पुरिमञ्च दिसं राजा, धतरट्ठो तं पसासति ।
गन्धब्बानं आधिपति महाराजा यसस्सिसो ॥15॥
पुत्तापि तस्स बहवो, इन्दनामा महब्बला ।
इद्धिमन्तो जुतीमन्तो, वण्णवन्तो यसस्सिनो ।
मोदमानाअभिक्कामुं, भिक्खूनं समितिं वनं ॥16॥
दक्खिणञ्च दिसं राजा, विरुल्हो तं पसासति ।
कुम्भण्डानं आधिपति, महाराजा यसस्सिसो ॥17॥
पुत्तापि तस्स बहवो, इन्दनाम महब्बला ।
इद्धिमन्तो जुतीमन्तो, वण्णवन्तो यसस्सिनो ।
मोदमाना अभिक्कामुं, भिक्खूनं समितिं वनं ॥18॥
पच्छिमञ्च दिसं राजा, विरूपक्खो तं पसासति ।
नागानं अधिपति, महाराजा यसस्सि सो ॥19॥
पुत्तापि तस्स बहवो, इन्दनामा महब्बला ।
इद्धिमन्तो जुतीमन्तो वण्णवन्तो यसस्सिनो ।
मोदमाना अभिक्कामुं, भिक्खूनं समितिं वनं ॥20॥
उत्तरञ्च दिसं राजा, कुवेरो तं पसासति ।
यक्क्खानं अधिपति, महाराजा यसस्सि सो ॥21॥
पुत्तापि तस्स बहवो, इन्दनामा महब्बला ।
इद्धिमन्तो जुतीमन्तो, वण्णवन्तो यसस्सिनो ।
मोदमाना अभिक्कामुं, भिक्खूनं समितिं वनं ॥22॥
पुरिमं दिसं धतरट्ठो, दक्खिणेन विरुल्हको ।
पच्छिमेन विरूपक्खो, कुवेरो उत्तरं दिसं ॥23॥
चत्तारो ते महाराजा, समन्ता चतुरो दिसा ।
दद्दल्लमाना अट्ठंसु, वने कापिलवत्थवे ॥24॥
तेसं मायाविनो दासा, आगु वञ्चनिका सठा ।
माया कूटेण्डु वेटेण्डु, विटुच्च विटुडो सह ॥25॥
चन्दनो कामसेट्ठो च, किन्नुघण्डु निघण्डु च ।
पनादो ओपमञ्ञो च, देवसूतो च मातली ॥26॥
चित्तसेनो च गन्धब्बो, नलो राजा जनेसभो ।
आगु पञ्चसिखा चेव, तिम्बरू सूरियवच्चसा ॥27॥
एते चञ्ञे च राजानो, गन्धब्बा सह राजुभि ।
मोदमाना अभिक्कामुं, भिक्खूनं समितिं वनं ॥28॥
अथागु नामसा नागा, वेसाला सह तच्छका ।
कम्बलस्सतरा आगु, पायागा सह ञातिभि ॥29॥
यामुना धतरट्ठा च, आगु नागा यसस्सिनो ।
एरावणो महानागो, सोपाग समितिं वनं ॥30॥
ये नागराजे सहस्सा हरन्ति, दिब्बा दिजा पक्खिविसुद्धचक्खु ।
वेहासया ते वनमज्झपतत्ता, चित्रा सुपण्णा इति तेसं नामानि ॥31॥
अभयं तदा नागराजानमासि, सुपण्णतो खेममकासि बुद्धो ।
सण्हाहि वाचाहि उपव्हयन्ता नागा सुपण्णा सरणमगंसु बुद्धं ॥32॥
जिता वजिरहत्थेन, समुद्दं असुरा सिता ।
भातरो वासवस्सेते इद्धिमन्तो यसस्सिनो ॥33॥
कालकञ्जा महाभिंसा, असुरा दानवेघसा ।
वेपचित्ति सुचित्ति च, पहारादो नमुचि सह ॥34॥
सतञ्च बलिपुत्तानं सब्बे वेरोचनामका ।
सन्नय्हित्वा बलिं सेना राहुभद्दमुपागमुं ।
समयोदानि भद्दन्ते भिक्खूनं समितिं वनं ॥35॥
आपो च देवा पठवी च तेजो वायो तदागमुं ।
वरुणा वारुणा देवा, सोमो च यससा सह ॥36॥
मेत्ता करुणा कायिका, आगु देवा यसस्सिनो
दसेते दसधा काया, सब्बे नानत्तवण्णिनो ॥37॥
इद्धिमन्तो जुतीमन्तो वण्णवन्तो यसस्सिनो ।
मोदमाना अभिक्कामुं, भिक्खूनं समितिं वनं ॥38॥
वेण्हू देवा सहली च, असमा च दुवे यमा ।
चन्दस्सूपनिसा देवा, चन्दमागु पुरक्खत्वा ॥39॥
सुरियस्सूपनिसा देवा, सुरियमागु पुरक्खत्वा।
नक्क्खत्तानि पुरक्खत्वा आगु मन्दवलाहका ॥40॥
वसूनं वासवो सेठ्ठो, सक्कोपाग पुरिन्ददो ।
दसेते दसधा काया, सब्बे नानत्तवण्णिनो ॥41॥
इद्धिमन्तो जुतीमन्तो, वण्णवन्तो यसस्सिनो ।
मोदमाना अभिक्कामुं, भिक्खूनं समितिं वनं ॥42॥
अथागु सहभू देवा, जलमग्गिसिखारिव ।
अरिट्ठका च रोजा च, उम्मापुप्फनिभासिनो ॥43॥
वरुणा सह धम्मा च, अच्चुता च अनेजका ।
सूलेय्यरुचिरा आगु, आगु वासवनेसिनो ॥44॥
दसेते दसधा काया, सब्बे नानत्तवण्णिनो ।
इद्धिमन्तो जुतीमन्तो, वण्णवन्तो यसस्सिनो ।
मोदमाना अभिक्कामुं, भिक्खूनं समितिं वनं ॥45॥
समाना महासमाना, मानुसा मानुसुत्तमा ।
खिड्डापदूसिका आगु, आगु मनोपदूसिका ॥46॥
अथागु हरयो देवा ये च लोहितवासिनो ।
पारगा महापारगा, आगु देवा यसस्सिनो ॥47॥
दसेते दसधा काया, सब्बे नानत्तवण्णिनो ।
इद्धिमन्तो जुतीमन्तो, वण्णवन्तो यसस्सिनो ।
मोदमाना अभिक्कामुं, भिक्खूनं समितिं वनं ॥48॥
सुक्का करुम्हा अरुणा, आगु वेघनसा सह ।
ओदातागय्हा पामोक्खा, आगु देवा विचक्क्खणा ॥49॥
सदामत्ता हारगजा, मिस्सका च यसस्सिनो ।
थनयं आम पज्जुन्नो, यो दिसा अभिवस्सति ॥50॥
दसेते दसधा काया, सब्बे नानत्तवण्णिनो ।
इद्धिमन्तो जुतीमन्तो वण्णवन्तो यसस्सिनो ।
मोदमाना अभिक्कामुं भिक्खूनं समितिं वनं ॥51॥
खेमिया तुसिता यामा, कट्ठका च यसस्सिनो ।
लम्बीतका लामसेट्ठा, जोतिनामा च आसवा ॥52॥
निम्मानरतिनो आगु, अथागु परनिम्मिता ।
दसेते दसधा काया, सब्बे नानत्तवण्णिनो ॥53॥
इद्धिमन्तो जुतीमन्तो, वण्णवन्तो यसस्सिनो ।
मोदमाना अभिक्कामुं, भिक्खूनं समितिं वनं ॥54॥
सट्ठेते देवनिकाया, सब्बे नानत्तवण्णिनो ।
नामन्वयेन आगच्छुं ये चञ्ञे सदिसा सह ॥55॥
पवुत्थजातिं अखिलं, ओघतिण्णमनासवं ।
दक्खेमोघतरं नागं, चन्दंव असितातिगं ॥56॥
सुब्रह्मा परमत्तो च, पुत्ता इद्धिमतो सह ।
सनं कुमारो तिस्सो च सोपाग समितिं वनं ॥57॥
सहस्सं ब्रह्मलोकानं, महा ब्रह्माभितिट्ठति ।
उप्पन्नि जुतीमन्तो, भिस्माकायो यसस्सिसो ॥58॥
दसेत्थ इस्सरा आगु, पच्चेकवसवत्तिनो ।
तेसञ्च मज्झतो आग, हारितो परिवारितो ॥59॥
ते च सब्बे अभिक्कन्ते, सइन्दे देवे सब्रह्मके ।
मारसेना अभिक्कामि, पस्स कण्हस्स मन्दियं ॥60॥
एथ गण्हथ बन्धथ, रागेन बद्धमत्थु वे।
समन्ता परिवारेथ, मा वो मुञ्चित्थ कोचिनं ॥61॥
इति तत्थ महासेनो, कण्हसेनं अपेसयी ।
पाणिना तलमाहच्च सरं कत्वान भेरवं ॥62॥
यथा पावुस्सको मेघो, थनयन्तो सविज्जुको ।
तदा सो पच्चुदावत्ति संकुद्धो असयंवसी ॥63॥
तञ्च सब्बं अभिञ्ञाय, ववक्खित्त्वान चक्खुमा ।
ततो आमन्तयी सत्था सावके सासने रते ॥64॥
मारसेना अभिक्कन्ता, ते विजानाथ भिक्खवो ।
ते च आतप्पमकरुं, सुत्वा बुद्धस्स सासनं ।
वीतरागेहि पक्कामुं, तेसं लोमम्पि इञ्जयुं ॥65॥
सब्बे विजितसंगामा, भयातीता यसस्सिनो ।
मोदन्ति सह भूतेहि सावका ते जनेसुताति॥66॥
महासमयसुत्तं निट्ठितं