एवं मे सुतं एकं समयं भगवा, सावत्यिं विहरति जेतवने अनाथपिण्डिकस्स आरामे । अथ खो अञ्ञतरा देवता अभिक्कन्ताय रत्तिया अभिक्कन्तवण्णा केवलकप्पं जेतवनं ओभासेत्वा येन भगवा तेनुपसंकमि । उपसंकमित्वा भगवन्तं अभिवादेत्वा एकमन्तं अट्ठासि । एकमन्तं ठिता खो सा देवता भगवन्तं गाथाय अज्झभासि ।
पराभवं पुरिसं, मयं पुच्छाम गोतमं ।
भगवन्तं पुट्ठुमागम्म, किं पराभवतो मुखं ॥ १ ॥
सुविजानो भवं होति, सुविजानो पराभवो ।
धम्मकामो भवं होति, धम्मदेस्सी पराभवो ॥ २ ॥
इति हेतं विजानाम, पठमो सो पराभवो ।
दुतियं भगवा ब्रूहि, किं पराभवतो मुखं ॥ ३ ॥
असन्तस्स पिया होन्ति, सन्ते न कुरुते पियं ।
असतं धम्मं रोचेति, तं पराभवतो मुखं ॥ ४ ॥
इति हेतं विजानाम, दुतियो सो पराभवो ।
ततियं भगवा ब्रूहि, किं पराभवतो मुखं ॥ ५ ॥
निद्दासीली सभासीली, अनुट्ठाता च यो नरो ।
अलसो कोधपञ्ञाणो, तं पराभवतो मुखं ॥ ६ ॥
इति हेतं विजानाम ततियो सो पराभवो ।
चतुत्थं भगवा ब्रूहि, तं पराभवतो मुखं ॥ ७ ॥
यो मातरं वा पितरं वा जिण्णकं गतयोब्बनं ।
पहुसन्तो न भरति, तं पराभवतो मुखं ॥ ८ ॥
इति हेतं विजानाम, चतुत्थो सो पराभवो ।
पञ्चमं भगवा ब्रूहि किं पराभवतो मुखं ॥ ९ ॥
यो ब्राह्मणं वा समणं वा, अञ्ञं वा पि वणिब्बकं ।
मुसावादेन वञ्चेति, तं पराभवतो मुखं ॥ १० ॥
इति हेतं विजानाम, पञ्चमो सो पराभवो ।
छट्ठमं भगवा ब्रूहि, किं पराभवतो मुखं ॥ ११ ॥
पहूतवित्तो पुरिसो, सहिरञ्ञो सभोजनो ।
एको भुञ्जति सादूनि, तं पराभवतो मुखं ॥ १२ ॥
इति हेतं विजानाम, छट्ठो सो पराभवो ।
सत्तमं भगवा ब्रूहि, किं पराभवतो मुखं ॥ १३ ॥
जातित्थद्धो धनत्थद्धो, गोत्तत्थद्धो च यो नरो ।
सञ्ञातिं अतिमञ्ञेति, तं पराभवतो मुखं ॥ १४ ॥
इति हेतं विजानाम, सत्तमो सो पराभवो ।
अट्ठमं भगवा ब्रूहि, किं पराभवतो मुखं ॥ १५ ॥
इत्थिधुत्तो सुराधुत्तो, अक्खधुत्तो च यो नरो ।
लद्धं लद्धं विनासेति, तं पराभवतो मुखं ॥ १६ ॥
इति हेतं विजानाम, अट्ठमो सो पराभवो ।
नवं भगवा ब्रूहि, किं पराभवतो मुखं ॥ १७ ॥
सेहि दारेहि असन्तुट्ठो, वेसियासु पदिस्सति ।
दिस्सति परदारेसु, तं पराभवतो मुखं ॥ १८ ॥
इति हेतं विजानाम, नवमो सो पराभवो ।
दसमं भगवा ब्रूहि, किं पराभवतो मुखं ॥ १९ ॥
अतीतयोब्बनो पोसो, आनेति तिम्बरुत्थनिं ।
तस्सा इस्सा न सुपति, तं पराभवतो मुखं ॥ २० ॥
इति हेतं विजानाम, दसमो सो पराभवो ।
एकादसमं भगवा ब्रूहि, किं पराभवतो मुखं ॥ २१ ॥
इत्तिं सोण्डिं विकिरणिं, पुरिसं वापि तादिसं ।
इस्सरियस्मिं ठपापेति, तं पराभवतो मुखं ॥ २२ ॥
इति हेतं विजानाम, एकादसमो सो पराभवो ।
द्वादसमं भगवा ब्रूहि, किं पराभवतो मुखं ॥ २३ ॥
अप्पभोगो महातण्हो, खत्तिये जायते कुले ।
सो च रज्जं पत्थयति, तं पराभवतो मुखं ॥ २४ ॥
एते पराभवे लोके, पण्डितो समवेक्खिय ।
अरियो दस्सनसम्पन्नो, स लोकं भजते सिवन्ति ॥ २५ ॥
पराभव सुत्तं निट्ठितं